Laupepa Muamua

• Amata i le tausaga fou ia vasega a le ulua'i Iunivesite o le Gagana Samoa
• Polikiti ma Palota

Aoga ma Tupulaga

Source: Samoanew.com (November 25, 2005)

Amata i le tausaga fou ia vasega a le ulua'i Iunivesite o le Gagana Samoa

Ua fa'alauiloa mai e le Sosaiete a le SIEAS i le aso Lua na sei mavae atu nei, ia le amataina o vasega mo le ulua'i Iunivesite o le Gagana Samoa i totonu o Amerika Samoa, ia Ianuari o le tausaga fou. O lenei iunivesite ua fa'aigoaina o le "AMOSA o Savavau" ma o lenei iunivesite, e pei ona sa saunoa Dr. Salu Hunkin, e pasia lava e tagata lava o Samoa. O le a fuaina lenei iunivesite ia i latou o le a faauuina mai ai, ma galulue i totonu o le atunuu.

Sa fa'aalia mai foi e Hunkin, o loo tulimata'i lenei aoga ia faiaoga o lo'o aoaoina fanau aoga. O ai lava o le a mafai ona faamaeaina ana vasega o le Filosofia, Fefaatauaiga, Aoaoga ma le Gagana Samoa i le va o le 5 i le 6 vaiaso, o le a faapea ona maua lana tusi pasi. Ua iai foi nisi o faiaoga mai i Samoa ua maea ona valaaulia e latou te malaga mai e galulue i totonu o lenei iunivesite.

Sa fa'ailoa mai e le susuga Muagututi'a John Fuimaono, le peresetene o le SIEAS, ia le toatele o faiaoga o lo'o taumafai mai mo ni o latou avanoa e fetufaa'i ai o latou malamalama i le gagana Samoa.

E pei ona sa taua i se fa'asalalauga lata mai nei a le SIEAS, o le autu o lenei sosaiete ina ia mafai ona uunaia tagata o le atunuu ina ia mautu lo latou agaga Samoa moni.

Sa saunoa ia le afioga Aiono Dr. Fanaafi Le Tagaloa, lea ua avea ma peresetene o le Iunivesite fou, o alo ma fanau a Samoa, o ni tagata atamamai, ae peitai, o lo'o iai sona talitonuga, e le o talafeagai le latou su'e i ni suega o lo'o tusia i gagana ese.

Sa ta'ua e Hunkin le silia ma le 20 tausaga o su'e ai fanau aoga a Amerika Samoa i suega a le Kolisi Tuufaatasi o le "Igilisi" ma le Matematika, ma e 80% e le pasi nei suega. O lona uiga, mai i fanau aoga e toalima na faauu mai i aoga maualuluga a Amerika, e to'afa e le agava'a e ulufale atu i Kolisi po o iunivesite. Ma o le toatele o fanau aoga fou o lo'o ulufale atu i le Kolisi, e toe foi e ave vasega faigofie ina ia mafai ona aoaoina mea sa tatau ona aoao mai i aoga maualuluga, ma ua talitonu Hunkin, o se tulaga matua'i faamaumau taimi lea lava tulaga.

O lo'o iai se faamoemoega ia Aiono o le a mafai ona suia lenei tulaga, i le tulai mai o le iunivesite fou i le gagana Samoa. O le afioga Aiono sa faavaeina le "Amosa o Savavau" lea o lo'o iai nei lona ofisa tutotonu i le fogafale lona lima a le Ioane Viliamu i Apia. O faleaoga o lo'o i Vaitele.

O sui o le sosaiete a le SIEAS, o lo'o i lalo o le taitaiga a le susuga Muagututi'a John Fuimaono, o lona sui peresetene o Aeoainuu Aleki, o le Failautusi, o Robert Maez.

Osini Faleatasi, Inc. dba Samoa News reserves all rights.

---

Polikiti ma Palota

Tali Amata i le Tu'ua'iga a Eni - Amata responds to Eni's personal assaults on her character
August 05, 2006

E muamua ona ou fa'atulou i le au faitau, Amerika Samoa, mai ou Ao e o'o lava i se toe tagata o si o tatou atunu'u. Ekalesia, Faigamalo, ma le atunu'u atoa i ona tulaga fa'alupe. Fa'agafua ia le nofoaga ae magalo se leo o le auauna. Ua ou manatua le upu: "Ua lavea fua Foaga e le'i faimisa. Ia po'o le: Na'o le gata e fasia o pupula mata. Sa o'o ane fo'i se manatu, "Aua e te tali atu i le tagata e tusa ma lona to'atama'i, po'o le sa'o ea lea?"

E ui fo'i i nisi lagona ae manumalo lava le fa'aaloalo ia Amerika Samoa, ma ou te fa'amagalo atu i tu'ua'iga ua fai fua ai lava a'u. Malu le vai Tutuila ma Manu'a, pau le itu sa ou taumafai atu i ai e fa'apupula o le lafoga 936 lea semanu e a'afia ai kamupani tu'uapa i'a i Amerika Samoa o lo'o fa'alagolagoi ai le tamaoaiga.

O vaega ia e aofiai le 30A o ua pasia nei, o le aufaigaluega a le Konekeresi sa galulue ai talu mai le 2004 e aofia ai ma lo'u tagata.

O TU'USAUNOAGA O LAFOGA NEI SA MANA'O FALEOMAVAEGA E TOE FO'I I KAMUPANI PO'O LE PULEGA O KAMUPANI TETELE I AMERIKA. AE SA OU MANA'O E ALU SA'O LAVA I TOTOGI O NAI TAGATA FAIGALUEGA I'INEI E AOGA MO LE TAMAOAIGA O AMERIKA SAMOA AE LE O LE TOE AVEA FO'I I FAFO I AMERIKA.

O le tali lea e ala i le fa'aaoga o lafoga mo totogi o tagata faigaluega i a tatou kamupani i'a, ua loa ona ou galue ai e ala i le aufaigaluega a le Konekeresi i le ta'ita'iga a le Vaega Malosi, e le o se manatu fa'ato'a oso ane ananafi pei o le Faipule o le Konekeresi o Amerika Samoa.

O le mea lea, soia le a'afia fua o a'u ou te le o galue i le tofi i Uosigitone ua na ona fesoasoani i so'o se ala ou te mafai mo Amerika Samoa ae fa'amasino ana lava lau fa'afofoga Tutuila ma Manu'a. Ma ou te toe fa'apea atu, o se upu ua lafo vale fa'amagalo mai, e poto lava le tautai ae sese le atu i ama.

---

Ou te le fiu!

"Se'i vagana ua ou tautua mo Amerika Samoa e ala i le tofiga Faipule i le Konekeresi.."
Aumua mo le Laumua!

Tusia: Leua Aiono Frost, Samoa Post Correspondent
Iuni 6, 2004

"Ua ou mana'o e te ta'u maia ia te a'u, po'o le a tonu lava mea e te mana'o e fa'ataunu'u mo lo tou olaga iinei, ona tu'u mai lea o lou fa'atuatuaga ia te a'u, ou te alu e fa'atino mai i le Konekeresi..." O se tautalaga mae'ae'a na folasia e le sui tauva mo le tofiga Faipule mo Amerika Samoa i le Konekeresi, Aumua Amata Coleman. Sa ia folasia ai le tele o ni ona manatu e tusa ai o sana tautua ua ia sauni e fa'atino, pe afai o le to mai le pule a Tutuila ma Manu'a ia te ia i lenei lua tausaga o le a savalia, e tautua mai ai i totonu o le Konekeresi a le Malo Tele. "O le a sou taofi, pe afai ua toe lava o le tofiga e mafai ai ona fa'ao'o nisi o fuafuaga mo so tatou manuia, ona fa'auia atu lea o nei manuia uma ua maea aiaia ina ia pasia mai mo i tatou?" E le gata i lea, ae ua maea tautua o ia i le laumua, ma ua to'atele sui mamalu o le Konekeresi e mafai ona ia fa'afeso'ota'ia e mafai ai ona fesoasoani i le tele o ni fa'aiuga e fia f a'aleleia ai mataupu ua a'afia ai le soifua o tatou tagata i teritori, ma isi atunu'u o Asia. O nisi o mea sa iloga ona aoga ai le tautua a Aumua Amata, o le toe fa'atula'ia mai o le alagatupe e fa'atupe ai le Upward Bound i le Kolisi Tu'ufa'atasi. O lea fesoasoani sa ia faia, ua manatu o ia, o se mea e tatau ona faia, ma e aoga tele i le fanau fa'au'u mai a'oga maualuluga. "I le taimi nei, ou te fa'ailoa atu, ou te fiafia e galulue fa'atasi ma ta'ita'i filifilia o le tatou atunu'u, po'o ai lava o le a tutula'i mai i tofiga taiulu, ina ia mafai so'otauau tautua mo le mamalu lautele o le atunu'u."

O sana lauga i le Gagana Samoa o lo ua mae'a ona lomia atu i lenei lava tala tusia, mo le faitau a le to'atele e le'i fa'afofoga ia te ia ma lana tima'iga i le atunu'u, aua le tofiga Faipule i le Konekeresi, i le palotaga ia Novema, 2004:

"Talofa. O a'u o AMATA suitauva mo le Konekeresi i Uosigitone. Ina ua fa'alauiloa lo'u fa'amoemoe ia Fepuari e fia avea ma outou Faipule i le Maota o Sui o le Iunaite Setete i Uosigitone, sa lofia a'u i upu fa'ala'ei'au ma fa'aosofia lo'u tagata e fia tautua mo le atunu'u. Ina ua asiasi atu i afioaga ma solivale maota ma laoa, tou te le'i tulia ese a'u, sa talia ma le fiafia. Sa ou fa'alogo ma le toto'a i atugaluga eseese, ma o ina sa a'e ai se manatu o le a ou toe taumafai mo le tofi. Atonu o fa'apea nisi: "E le fiu lava Amata?" O la'u tali: "E le taitai o'u fiu!" Aisea? Se'i loga lava ua fai so'u aoga mo Amerika Samoa e ala i le tofi Faipule i Uosigitone. O ina fo'i na tutu ai le sulu o le Fa'amoemoe Ola. Le fa'amoemoe mo se taeao sili ma le manuia mo tupulaga o a taeao ma le lumana'i. Sa fesiligia a'u e Peresetene Bush i le tolu tausaga ua mavae, e fia malamalama i mana'oga e le'i fa'ataunu'uina o tagata o atumotu, sa lagona le fa'atauva'a ona o le mamafa ma le taua o lea tiute. O le Komisi Faufautua a le Peresetene mo tagata Amerika mai le Pasefika ma Asia, na'o a'u lava le tagata mai atumotu o lo'o filo ai i sui e to'a sefulu fa, ma o se galuega lautele ma le fita. E le gata i lea o la matou galuega e taga'i toto'a i mana'oga o tagata o atumotu i setete fa'apea ma atumotu. O le mea lea ua ou fiafia e fa'ailoa atu i lo outou mamalu ua mae'a lea galuega ua tau'a'ao nei e le Maota Pa'epa'e la matou ripoti i mataupu tau soifua maloloina o vaega uma o tagata Amerika mai le Pasefika ma Asia eaofia ai Amerika Samoa. E le'o se mea e mitamita ai ae ave le vi'iga i le Matai na mafai ai.

O Oketopa taluai, sa filifilia ai a'u e le Asosi o Tama'ita'i Aoao Amerika mai Asia e fai ma "Tama'ita'i Maoa'e o le tausaga 2003-2004." Na maua ai lo'u avanoa e talanoa ai i tagata o atumotu i le Malo Aoao. Sa fai a'u ma sui o le Persetene e momoli ona mo'omo'oga alofa i alo ma fanau a'oga i Idaho, fa'apea ma sauniga a tagata o atumotu i San Diego ma Phoenix. Sa ou lauga fo'i i tagata faigaluega a le Malo Tele mai le Pasefika ma Asia i San Francisco ma Maryland, sa ou feiloa'i atu ai i alo ma fanau a Samoa o lo'o i vaega'au eseese a le Malo Tele. Ma ou te fiafia e fa'ao'o atu o latou alofa'aga ma fa'amanuiaga mo le Tapua'iga ma Talosaga mo latou a'o tatou nofo valavala ai. Sa ou auai fo'i i le fa'amanutuina o le fitu sefulu tausaga o le Susuga i le Faife'au ia Otto Galea'i le uso o le Afioga ia Senatoa Faiivae.

E fiafia fo'i e fa'ailoa atu ua avea la'u galuega i le Vaega o lo'o fa'atautaia le Maota o Sui ma ala ua mafai ona fa'ailoa atu o tatou fa'amoemoe i ta'ita'i o le Malo Tele i le Maota o Sui. O ia tofiga taua ua amana'ia ai lo'u tagata i le Maota o Sui ma le Komisi a le Peresetene uafaigofie ai le tele o mana'oga o Amerika Samoa e fia fa'ao'o atu i ai. E ui lava i na tautua ae le atoatoa vagana le la'asaga e tasi o lo'o totoe nei o le avea lea o a'u ma FAIPULE O LE KONEKERESI i Uosigitone mai Amerika Samoa. E le faitauina ni aoga o se tagata mo lona Malo, a e mo le silafia o se tasi o fesoasoani sa ou faia mo le Porokalama o le Upward Bound i le Kolisi Tu'ufa'atasi i Mapusaga sa o'o ane ia te a'u ona ua le toe maua vaega tupe mai le Malo Tele mo lea porokalama. ma ua uma fo'i ona uia auala mo se fesoasoani o lea sa tapa ai la'u fesoasoani. O ina sa aoga ai So'otaga ua loa tausaga o taumafai mo tagata mautofi i le aufaigaluega a le Maota o Sui e gata mai le itu tau a'oa'oga ma le Matagaluega a A'oga a le Malo Tele ma ua toe maua ai e la tatou Kolisi Tu'ufa'atasi lea vaegatupe semanu e ma'umau mai le Malo Tele. E le o a'u a'o le Atua ma la outou tatalo na mafua ai.

Sa fa'afeso'ota'i a'u e se tina mai Pago Pago mo se visa o si ana tama e auai i se fa'atasiga a le aiga i Amerika toe tolu aso fa'atino. Sa ou galue loa ma le Pule o le Vaega Ta'ita'i o le Maota o Sui ma le amapasa o le Iunaite Setete i Niu Sila. Ma o le upu moni na'o le sefulu lua itula ae maua le visa. O le vavega na ala ona mafai ona o le Ali'i ma la outou tatalo. O le pogai lena ua ou loto tele ma mafanafana ai i le lenei taumafaiga. E tele le alofa o le Atua e ala i lo'u tagata ae tau ina ou fa'apea atu aumaia lou fa'atuatuaga ou te tiu ai ma auina atu a'u e fai ma outou FAIPULE I LE KONEKERESI I LE LAUMUA, o lea pei e fetaui lo'u igoa ma le fa'amoemoe o AUMUA I LE LAUMUA! O le a sou finagalo?"


Fa'afetai fa'aaloalo.

TOP

---

Filifilia komiti kemupeni mo le konekeresi a Amata
Aperila 17, 2004

PAGO PAGO. O le aso Lulu o le vaiaso ua mavae na faia ai se faatasiga a i latou o lo'o lagolagoina le tofa Aumua Amata Coleman e avea ma sui faipule o Amerika Samoa i totonu o le konekeresi ma i lea faatasiga sa latou filifilia ai nisi e avea ma sui o le komiti e fa'afoea le kemupeni a Amata. Sa faatumulia le Yacht Club i Utulei i le mamalu o le atunu'u, aiga ma uo a Amata aua so latou naunauta'iga ina ia i'u manuia lenei faamoemoe.

O i latou ua filifilia e avea ma sui o le komiti e fa'afoea lenei taumafaiga, ua aofia ai Magele Apelu Aitaoto o le ta'ita'i komiti, ae lagolagosua i ai Tuika Tuika ma Muavaefa'atasi Ae Ae Jr.

O nisi o sui o le komiti ma o latou tiute tauave taitasi, e aofia ai Saiolo Saiaana Sturms o le a gafa ma mataupu e patino i Fitafita Tuai, o le faletua ia Filigata Tarrant e gafa ma mataupu e patino i Tina ma Tama'ita'i o le atunu'u. O le Autalavou o le a i lalo o le va'ava'aiga a le afioga Muavaefa'atasi Ae Ae Jr. ma Paulava Malala, o Maggie Craddick o le a gafa ma le va fealoa'i ae fesoasoani i ai Suni Sesepasara Felise ma Litara Alaimo.

O sa'iliga tupe o le matafaioi lea a Mike Su'esu'e Lutu, o polokalama e a'afia ai nu'u ma alalafaga ta'itasi, o le a fa'afoeina e Sene Niupulusu, o le failautusi o le komiti o le tama'ita'i o Cyndi Moliga ae o Mike Usle ua filifilia e avea ma Teutupe fa'atasi ai ma le fesoasoani mai o Gataivai Mageo Naea.

O le isi fonotaga o loma nei mo lenei faalapotopotoga, e faia lea i le aso To'ona'i, Me lona aso muamua i le 10 i le taeao i le faletalimalo o le afioga Pulu i Pago Pago, ma ua vala'aulia le mamalu lautele i lenei fonotaga.

TOP

---

Taumafai Amata mo le tofi Sui Faipule o Amerika Samoa i Uosigitone

(PAGO PAGO – Fepuari 27, 2004) -- Ua o'o mai nei se lipoti aloa'ia mai i le tofa Aumua Amata Kolumane, o le a fa'apea ona ia taumafai atu mo le tofi o le Sui Faipule mo Amerika Samoa i totonu o le Maota o Sui a le Fono Faitulafono o le Malo Tele a le Iunaite Setete.

O lo'o iai nei le tofa Aumua i totonu o le teritori aua le fa'atulagaina o ana fuafuaga mo lana kemupeni. E pei ona sa ia fa'alauiloa mai, ua mafai ona ia faia lenei fa'ai'uga ona o le lagolago malosi atu a lona aiga, ta'ita'i o nu'u ma alalafaga, ta'ita'i fa'aleMalo aemaise le to'atele o le mamalu o le atunu'u.

O le tofa Aumua sa fa'apea ona fesoasoani malosi i le fa'avaeina o le polokalama lea o lo'o iai nei i totonu o le Kolisi Tu'ufa'atasi a Amerika Samoa, le Upward Bound. Ma o lo'o ia fa'aauau pea ona fa'ailoa mai i le atunu'u ma ona ta'ita'i ia avanoa o lo'o iai mo sikolasipi aua le alualu i luma o fanau aoga.

O lo'o avea foi le tofa Aumua ma sui o Amerika Samoa i totonu o le Fa'alapotopotoga fa'avaomalo o lo'o fa'asaga tau i le kanesa o le susu, ma sa ia fesoasoani foi i le fa'avaeina o le Teugatupe mo le Soifua Maloloina o Tama'ita'i Samoa, lea na mafai ai ona o'o mai le masini e su'e ai le kanesa o le susu, i totonu o le teritori. Sa mafai foi ona fesoasoani le tofa Aumua ina ia u'una'ia le Peresetene o Amerika ina ia o'o mai fesoasoani a le Malo Feterale, i taimi na a'afia ai le teritori i lologa ma sologa ia Me o le tausaga ua mavae, fa'apea ma le afa o Heta lea na se'i mavae atu.

Na saunoa mai le tofa Aumua, o lo'o mana'omia e tagata o Amerika Samoa se sui o lo'o naunau e tautuaina o latou mana'o i aso ta'itasi, aemaise ai le fa'aleleia atili o tulaga i aoaoga fa'apea ma le soifua maloloina.

Ua talitonu Aumua, ua agava'a o ia mo lenei galuega ona ua silia le 7 tausaga talu ona ia tautuaina Tutuila ma Manu'a ma o le a fesoasoani atili le avea o ia ma sui o le Malo i totonu o le Konekeresi, e mafai ona tatalaina mai ai le tele o isi fesoasoani o lo'o mo'omia e le atunu'u.

Na fa'aalia mai foi e le tofa Aumua, o le ta'ita'iga a le itu Ripapilikana i totonu o le Konekeresi lea na mafai ai ona pasia le pili a le Peresetene o Amerika i le tausaga ua mavae, lea na mafai ai na maua e le teritori se tinoitupe e $10.4 miliona - na toeititi atoa le $6 miliona sa alu i le Medicaid mo Amerika Samoa.

O se tasi o fuafuaga autu a le tofa Aumua, pe afai ae fa'amanuiaina ana taumafaiga mo lenei tofi, o le tatalaina lea o se ofisa i totonu o le teritori ma fa'afaigaluega ai ni isi o le a mafai ona fesoasoani i le mamalu lautele. Ma o le a fa'apea ona iai ma se tasi o le a mafai ona fesoasoani i tagata o le atunu'u, e su'esu'e auala e mafai ai ona maua mai fesoasoani mai i le Malo Feterale.

TOP